ബെന്ന്യാമിന്റെ പ്രസിദ്ധ നോവലിനെ ആസ്പദമാക്കി ബ്ലസി സംവിധാനം ചെയ്യുന്ന ‘ആടു ജീവിതം’ എന്ന പൃഥ്വിരാജ് ചിത്രത്തിന്റെ മൂന്നാം ഷെഡ്യൂള്‍ ഷൂട്ടിംഗ് ജോര്‍ദാനില്‍ പുരോഗമിക്കുന്നു. കഥാപാത്രത്തിനായി മൂന്നു മാസത്തോളം എടുത്ത് മെലിയുകയും താടി വളര്‍ത്തുകയും ചെയ്ത പൃഥ്വിരാജ് തന്റെ സോഷ്യൽ മീഡിയയിൽ പങ്കുവെച്ച കുറിപ്പിലാണ് ഷൂട്ടിംഗ് സുരക്ഷിതമായി തുടരുകയാണെന്ന് അറിയിച്ചിരിക്കുന്നത്. യൂണിറ്റിലെ എല്ലാ അംഗങ്ങൾക്കും കൊറോണ ബാധയുണ്ടോയെന്ന ചെക്കപ്പ് നടത്തിയെന്നും മരുഭൂമിയിലെ ഒറ്റപ്പെട്ട ഒരു സ്ഥലത്താണ് ഷൂട്ടിംങ്ങു പുരോഗമിക്കുന്നതെന്നും പൃഥ്വി കുറിപ്പിൽ പറയുന്നു.
അദ്ദേഹത്തിൻറെ കുറിപ്പിലേക്ക്
‘സുരക്ഷിതരായിരിക്കൂ, ഇതെല്ലാം ജീവിതത്തിലെ ഓരോരോ പ്രതിസന്ധി ഘട്ടങ്ങളാണ്. ഒറ്റക്കെട്ടായി ഉണര്‍ന്നു പ്രവര്‍ത്തി
ക്കേണ്ട സമയം. ഇഷ്ടപ്പെട്ടവരില്‍ നിന്നു പോലും നാം അകലം പാലിക്കേണ്ട സമയം കൂടിയാണിത്. ഇതുവരെ കണ്ടിട്ടില്ലാത്ത ഏറ്റവും വലിയ വെല്ലുവിളിയെ ലോകം അഭിമുഖീകരിച്ചുകൊണ്ടിരിക്കുമ്പോള്‍ മറ്റുള്ളവരില്‍ നിന്നും അകലം പാലിച്ചും സ്വയം ശുചിയായി സൂക്ഷിച്ചും മാത്രവുമാണ് നമുക്കിതിനെ പ്രതിരോധിക്കാനാവൂ. എന്റെയും ആടുജീവിതം സിനിമയുടെ അണിയറപ്രവര്‍ത്തകരുടെയും സുരക്ഷയെക്കരുതി സന്ദേശങ്ങളയച്ച് ക്ഷേമമന്വേഷിച്ച ഏവര്‍ക്കും നന്ദി..
ഞങ്ങളിപ്പോള്‍ ജോര്‍ദാനിലെ വാദി റമ്മിലാണ് . ഷൂട്ട് തുടരുകയാണ്. അതു തന്നെയാണ് ഇപ്പോഴത്തെ സാഹചര്യത്തില്‍ ഉചിതമായ മാര്‍ഗം. അതിനാലാണ് ഷൂട്ട് തുടരാന്‍ തീരുമാനിച്ചത്. ജോര്‍ദാനിലെ വ്യോമഗതാഗതം പൂര്‍ണമായും നിരോധിച്ചിരിക്കുകയാണ്. എല്ലാവരും ഇവിടെ ആയ സ്ഥിതിക്ക് ഒന്നുകില്‍ ഈ മരുഭൂമിയിലെ ക്യാമ്പില്‍ കഴിയുക, അല്ലെങ്കില്‍ ക്യാമ്പില്‍ നിന്നും അധികം ദൂരെയല്ലാത്ത ലൊക്കേഷനില്‍ പോയി ഷൂട്ട് തുടരുക. അധികാരികളെ കണ്ടു.തുടർന്ന് യൂണിറ്റിലെ ഓരോ അംഗത്തിനും മെഡിക്കല്‍ ചെക്കപ്പ് നടത്തി. ലൊക്കേഷന്‍ ഒറ്റപ്പെട്ട സ്ഥലത്തായതിനാല്‍ അപകടമില്ല. ഇതോടെ ഷൂട്ട് തുടരാനുള്ള അനുമതി ലഭിച്ചിട്ടുണ്ട്.
എന്നാൽ ഞങ്ങളുടെ യൂണിറ്റിലെ രണ്ട് നടന്‍മാര്‍ അമ്മന്‍ എന്ന സഥലത്ത് ഇപ്പോൾ മുന്‍കരുതല്‍ ക്വാറന്റൈനിലാണ്. ഒരു വിമാനത്തില്‍ സഞ്ചരിച്ച മറ്റുള്ളവര്‍ക്കൊപ്പം തന്നെ അവരും നിരീക്ഷണത്തിലാണ്. രണ്ടാഴ്ച്ചത്തെ ക്വാറന്റൈന്‍ സമയം അവസാനിക്കുന്നതോടെ അവര്‍ നമുക്കൊപ്പം വീണ്ടും ചേരുമെന്നാണ് പ്രതീക്ഷ. അധികാരികള്‍ തരുന്ന നിര്‍ദേശങ്ങള്‍ക്ക് പ്രാധാന്യം കല്‍പിക്കുക. അവ അനുസരിക്കുക. ഭയക്കാതിരിക്കുക.’ പൃഥ്വിരാജ് കുറിച്ചു.
കോവിഡ് 19 നെ തുടര്‍ന്ന് വിദേശത്തു നിന്ന് ജോര്‍ദാനില്‍ എത്തുന്നവരെ മുന്‍കരുതല്‍ നടപടിയുടെ ഭാഗമായി ഇപ്പോള്‍ 14 ദിവസത്തേക്ക് നിരീക്ഷണത്തില്‍ വെക്കുന്നുണ്ട്. മാര്‍ച്ച് ആദ്യ ആഴ്ചയാണ് ‘ആടുജീവിത’ത്തിന്റെ ചിത്രീകരണം വാദി റും എന്ന സംരക്ഷിത മരുഭൂമി മേഖലയില്‍ തുടങ്ങിയത്.
You must be logged in to post a comment Login