ഉത്തര്‍പ്രദേശിലെ കനൗജിലെ ചിലോയി ഗ്രാമത്തിലാണ് ദുരന്തം സംഭവിച്ചത്. വെള്ളിയാഴ്ച രാത്രിയില്‍ 46 യാത്രക്കാരുമായി പോയ സ്വകാര്യ സ്ലീപ്പര്‍ ബസ്, ട്രക്കുമായി കൂട്ടിയിടിക്കുകയായിരുന്നു.തുടര്‍ന്ന് ബസിനു തീ പിടിച്ചു. 20 യാത്രക്കാര്‍ വെന്തുമരിച്ചു . 21 പേരെ പൊള്ളലേറ്റ നിലയില്‍ ആശുപത്രിയില്‍ പ്രവേശിപ്പിച്ചിട്ടുണ്ട്. പലരുടെയും നില ഗുരുതരമാണ്. ഫാറൂഖാബാദില്‍ നിന്ന് ജയ്പൂരിലേക്ക് പുറപ്പെട്ട ബസാണ് അപകടപ്പെട്ടത്.
അപകടം നടക്കുമ്പോള്‍ പലരും ഉറക്കത്തിലായിരുന്നു. ബസിന്റെ വാതിലുകളും ജനലുകളും തുറക്കാന്‍ സാധിക്കാതെ പോയത് അപകടത്തിന്‍റെ തീവ്രത വര്‍ധിപ്പിച്ചു. കൊല്ലപ്പെട്ടവര്‍ക്ക് പ്രധാനമന്ത്രി നരേന്ദ്രമോദി അനുശോചനം രേഖപ്പെടുത്തി. ” കനൗജിലുണ്ടായ അപകടം ദു:ഖത്തിലാഴ്ത്തി, നിരവധി പേര്‍ക്കാണ് ജീവന്‍ നഷ്ടമായത്, കൊല്ലപ്പെട്ടവരുടെ കുടുംബത്തെ അനുശോചനമറിയിക്കുന്നു, പരിക്കേറ്റവര്‍ ഉടന്‍ ജീവിതത്തിലേക്ക് തിരിച്ചെത്തുമെന്ന് പ്രത്യാശിക്കുന്നു. ” – പ്രധാനമന്ത്രി ട്വീറ്റ് ചെയ്തു. തുടര്‍ന്ന് കേന്ദ്ര ആഭ്യന്തരമന്ത്രി അമിത് ഷാ, കോണ്‍ഗ്രസ് നേതാവ് രാഹുല്‍ ഗാന്ധി എന്നിവര്‍ അനുശോചനമറിയിച്ചു.
അരമണിക്കൂര്‍ എടുത്താണ് നാല് ഫയര്‍ എന്‍ജിനുകള്‍ തീ അണച്ചത്. പൊള്ളലേറ്റ 21 പേരെ സാഹസികമായി രക്ഷപ്പെടുത്തുകയായിരുന്നു. തീയണച്ച ശേഷം ജീവനോടെ ആരും അവശേഷിച്ചിരുന്നില്ലന്ന്‍ കാണ്‍പൂര്‍ റേഞ്ച് ഐജി മോഹിത് അഗര്‍വാള്‍ മാധ്യമങ്ങളോട് പറയുകയുണ്ടായി. ബസില്‍ അപകടസമയത്ത് നിരവധിപേരുണ്ടായിരുന്നെന്ന് ദൃക്സാക്ഷികള്‍ പറഞ്ഞു. പരിക്കേറ്റവര്‍ക്ക് വിദഗ്ദ ചികിത്സ നല്‍കാന്‍ മുഖ്യമന്ത്രി യോഗി ആദിത്യനാഥ് ഉത്തരവിട്ടിട്ടുണ്ട് . കൊല്ലപ്പെട്ടവരുടെ കുടുംബത്തിന് 2 ലക്ഷം രൂപയും പരിക്കേറ്റവര്‍ക്ക് 50,000 രൂപയും ധനസഹായം നല്‍കും എന്ന് അദ്ദേഹം അറിയിച്ചു.
You must be logged in to post a comment Login