ചെന്നൈ: ലോക്ക് ഡൗണിനെ തുടര്‍ന്ന് മദ്യം കിട്ടാതായതോടെ പെയിന്റ് വാര്‍ണിഷില്‍ കലര്‍ത്തി കുടിച്ച് തമിഴ്നാട്ടില്‍ മൂന്ന് മരണം. തമിഴ്നാട്ടിലെ ചെങ്കല്‍പാട്ടിലാണ് സംഭവം. ശിവശങ്കര്‍, പ്രദീപ്, ശിവരാമന്‍ എന്നിവരാണ് ദാരുണമായി മരിച്ചത്.
മദ്യം കിട്ടാതെ അസ്വസ്ഥരായതിനെ തുടര്‍ന്ന് ഞായറാഴ്ചയാണ് ഇവര്‍ പെയിന്റ് വാര്‍ണിഷില്‍ ലയിപ്പിച്ച് കഴിച്ചത്. തുടര്‍ന്ന് ആരോഗ്യ നില വഷളായ ഇവരെ ചെങ്കല്‍പാട്ടിലെ സര്‍ക്കാര്‍ ആശുപത്രിയില്‍ പ്രവേശിപ്പിക്കുകയായിരുന്നുവെന്ന് ഇന്ത്യ ടുഡേ റിപ്പോര്‍ട്ടില്‍ പറയുന്നു. ആശുപത്രിയില്‍ പ്രവേശിപ്പിച്ചെങ്കിലും മൂന്ന് പേരുടെയും ജീവന്‍ രക്ഷിക്കാനായില്ല.
കൊറോണ വൈറസ് വ്യാപനം നിയന്ത്രിക്കുന്നതിനായുള്ള ലോക്ഡൗണിനെ തുടര്‍ന്ന് മദ്യം ലഭിക്കാതായതോടെയാണ് ഇവര്‍ പെയിന്റ് എടുത്ത് കുടിച്ചത്. മൂന്നു പേരും സ്ഥിരമായി മദ്യപിക്കുന്നവരായിരുന്നു എന്നാണ് അന്വേഷണത്തില്‍ കണ്ടെത്തിയത്.
കൊറോണയുടെ പശ്ചാത്തലത്തില്‍ 21 ദിവസം രാജ്യത്താകെ ലോക്ഡൗണ്‍ പ്രഖ്യാപിച്ചിരിക്കുന്ന സാഹചര്യത്തില്‍ രാജ്യത്തെവിടെയും മദ്യം ലഭ്യമല്ല. ഇതേ തുടര്‍ന്ന് സ്ഥിരമായി മദ്യപിക്കുന്നവര്‍ക്ക് അസ്വസ്ഥതകളുണ്ടാവുന്നെന്ന് നേരത്തെ റിപ്പോര്‍ട്ടുകള്‍ വന്നിരുന്നു.
ഇതിനിടെ, കേരളത്തില്‍ മദ്യം വാങ്ങാന്‍ ഡോക്ടര്‍മാര്‍ കുറിപ്പടി നല്‍കണമെന്ന സര്‍ക്കാര്‍ നേരത്തെ ഉത്തരവിട്ടിരുന്നു. എന്നാല്‍ ഉത്തരവ് ഹൈക്കോടതി സ്റ്റേ ചെയ്യുകയായിരുന്നു. മദ്യാസക്തിക്ക് മദ്യമല്ല പ്രതിവിധിയെന്നും , ഇത്തരത്തില്‍ മദ്യം കുറിച്ചുനല്‍കുന്നത് കേട്ടുകേള്‍വിയില്ലാത്ത സംഗതിയാണെന്നും ഹൈക്കോടതി വിമര്‍ശിച്ചിരുന്നു.
ഡോക്ടര്‍ ഒരു രോഗിക്ക് എന്ത് കുറിച്ചു നല്‍കണമെന്നത് സംസ്ഥാന സര്‍ക്കാരല്ല തീരുമാനിക്കുന്നതെന്നും സംസ്ഥാന സര്‍ക്കാര്‍ ഡോക്ടര്‍മാരാകേണ്ടെന്നും ചൂണ്ടിക്കാട്ടിയ ഹൈക്കോടതി ഡോക്ടര്‍മാര്‍ മദ്യം നല്‍കാന്‍ കുറിപ്പടിയെഴുതുകയും ഇത് എക്‌സൈസ് എടുത്ത് നല്‍കുകയും ചെയ്യുന്ന രീതി പരിഹാസ്യമാണെന്നും പറഞ്ഞു.
You must be logged in to post a comment Login