മകരത്തിൽ മരംകോച്ചുമെന്നു പറയുന്നതൊക്കെ പഴങ്കഥ. കേരളത്തിൽ റെക്കോർഡ് ചൂട് !

മകരത്തിൽ മരംകോച്ചും എന്നു പറയുന്നതൊക്കെ ഇപ്പോൾ പഴങ്കഥ. കേരളത്തിൽ റെക്കോർഡ് ചൂട്
ചരിത്രത്തിലെ ഏറ്റവും ചൂടിയേറിയ ശൈത്യകാലം ആണ് ഇപ്പോൾ കേരളത്തിൽ സംഭവിച്ചു കൊണ്ടിരിക്കുന്നത്. കോട്ടയം, പത്തനംതിട്ട, ആലപ്പുഴ ജില്ലകളിൽ ചൂട് 38 ഡി​ഗ്രി വരെ ഉയർന്നിരിക്കുകയാണ്. പൂനൈ ഇൻസ്റ്റിറ്റ്യൂട്ട് ഓഫ് ട്രോപ്പിക്കൽ മെറ്റീരിയോളജിയിലെ ​ഗവേഷകനായ റോക്സിയാണ് ഇത് പറയുന്നത്. തിരുവല്ല മാർത്തോമ്മാ കോളേജിൽ സംഘടിപ്പിച്ച കാലാവസ്ഥാ മാറ്റത്തെക്കുറിച്ചുള്ള സെമിനാറിൽ പങ്കെടുത്ത് സംസാരിക്കുകയായിരുന്നു ഡോക്ടർ റോക്സി. മകരത്തിൽ മരംകോച്ചും എന്നൊരു പഴമൊഴി തന്നെ നിലവിലുള്ള കേരളത്തിൽ അസാധാരണമായ ചൂടാണ് ഈ വർഷം അനുഭവപ്പെടുന്നത്. ആലപ്പുഴ, പത്തനംതിട്ട, പുനലൂർ, കോട്ടയം തുടങ്ങിയ സ്ഥലങ്ങളിൽ രാജ്യത്തെ തന്നെ ഏറ്റവും കൂടിയ താപനിലയാണ് രേഖപ്പെടുത്തിയിരിക്കുന്നത്. ഇത് ​ഗവേഷകരെ അത്ഭുതപ്പെടുത്തുന്നുവെന്നും അദ്ദേഹം പറയുന്നു. വടക്കേ ഇന്ത്യയില‍െ കാറ്റിന്റെ ​ഗതിയാണ് കേരളത്തിലെ കാലാവസ്ഥയെ നിയന്ത്രിക്കുന്നത്. വേ​ഗത്തിൽ ചൂടു പിടിക്കുന്ന അറബി കടലിലെ ഉയർന്ന താപനിലയാണ് മധ്യകേരളത്തിൽ താപനില ഉയരാൻ കാരണമായിരിക്കുന്നത്. കൂടാതെ ആ​ഗോള താപനവും താപനിലയെ ബാധിക്കുന്നുണ്ട്. ന​ഗരവത്കരണവും, വനനശീകരണവും, വാഹനങ്ങളുടെ എ.സി ഉപയോ​ഗത്തിലുള്ള വർദ്ധനവും പ്രാദേശികമായ താപനിലയെ ബാധിച്ചിട്ടുണ്ട്. കഴിഞ്ഞ ദിവസം രാജ്യത്തെ തന്നെ കൂടിയ താപനിലയായ 36.8 ഡി​ഗ്രി ചൂടും കുറഞ്ഞ താപനിലയാ 17.2 ഡി​ഗ്രി ചൂടും അടയാളപ്പെടുത്തിയത് പുനലൂരാണ്. ഇത് മരുഭൂമിവത്കരണത്തിന്റെ ലക്ഷണമാണെന്നാണ് ​ഗവേഷകർ പറയുന്നത്.