കൊറോണ ബാധ സൗദിയിൽ ജോലി ചെയ്യുന്ന മലയാളി നേഴ്സിനും സ്ഥിരീകരിച്ചു.

റിയാദ് : സൗദി അറേബ്യയിൽ ജോലി ചെയ്യുന്ന മലയാളി നേഴ്സിന് കൊറോണ വൈറസ് ബാധ സ്ഥിരീകരിച്ചു. കേന്ദ്ര മന്ത്രി വി.മുരളീധരൻ വ്യാഴാഴ്ച വൈകിട്ട് ട്വിറ്ററിലൂടെയാണ് ഇക്കാര്യം സ്ഥിരീകരിച്ചത്. സാർസ് രോ​ഗ ബാധയോട് സാമ്യമുള്ള ഈ രോ​ഗം ലോക രാഷ്ട്രങ്ങളെ പിടിച്ചു കുലുക്കിയിരിക്കുകയാണ്. ചൈനയിൽ ആണ് ആദ്യം റിപ്പോർട്ട് ചെയ്യപ്പെട്ടത്. അമേരിക്കയിലും രോ​ഗം റിപ്പോർട്ട് ചെയ്യപ്പെട്ടപ്പോൾ തന്നെ സൗദി ആരോ​ഗ്യ മന്ത്രാലയം ജാ​ഗ്രതാ നിർദ്ദേശം നൽകിയിരുന്നതാണ്. സൗദിയിലെ അൽ ഹയാത്ത് ആശുപത്രിയിൽ ജോലിനോക്കുന്ന 100 നേഴ്സുമാരെ പരിശോധനയ്ക്ക് വിധേയരാക്കിയിരിന്നു. ഒരു ഇന്ത്യൻ നേഴ്സിന് മാത്രമാണ് രോ​ഗം സ്ഥിരീകരിച്ചത്. സംശയമുള്ള 5 പേർ നീരിക്ഷണത്തിലാണ്. രോ​ഗംബാധിച്ച ഫിലിപ്പൈൻ നേഴ്സിനെ ശുശ്രൂഷിച്ചവർക്കാണ് ഇപ്പോൾ രോ​ഗം പടർന്നിരിക്കുന്നത്. മലയാളികളായ 30 നേഴ്സുമാരെ ഐസുലേഷൻ വാർഡിൽ നിരീക്ഷണത്തിൽ ആക്കിയിരിക്കുയാണ്. ഇപ്പോൾ സ്ഥിതി​ഗതികൾ രൂക്ഷമല്ല എന്നാണ് അധികൃതർ പറയുന്നത്. രോ​ഗം സംശയിക്കുന്നവരുടെ രക്ത സാമ്പിളുകൾ വി​ദ​ഗ്ദ പരിശോധനയ്ക്ക് അയച്ചിട്ടുണ്ട്. എംബസിയും നോർക്കയും സ്ഥിതി​ഗതികൾ വിലയിരുത്തുന്നുമുണ്ട്. കൊറോണ വൈറസ് ബാധിച്ചു മരിച്ചവരുടെ എണ്ണം 17 ആയതായി രാജ്യാന്തര മാധ്യമങ്ങൾ റിപ്പോർട്ടു ചെയ്തിട്ടുണ്ട്. ചൈനയിൽ മാത്രമായി 500 ൽ അധികം ആളുകൾ കൊറോണ വൈറസുമായി ബന്ധപ്പെട്ട് രോ​ഗം റിപ്പോർട്ട് ചെയ്തിട്ടുണ്ട്. അമേരിക്കയിലെ വാഷിം​ഗ്ടണിൽ വുഹാൻ സന്ദർശിച്ച 30 വയസ്സുകാരനും രോ​ഗം സ്ഥിരീകരിച്ചിട്ടുണ്ട്. ചൈനയിലെ വുഹാൻ ന​ഗരത്തിലെ പൊതു ​ഗതാ​ഗതവും ട്രെയിൻ സർവ്വീസും നിർത്തിവച്ചിട്ടുണ്ട്. രണ്ടായിരത്തിലധികം പേർ നിരീക്ഷണത്തിൽ ആണ്.