മനുഷ്യനിർമ്മിതമായ ഏറ്റവും കാഠിന്യമുള്ള വസ്തുക്കളിൽ ഒന്നാണ് ഗ്രാഫീൻ. കാണാൻ ഏകദേശം വല പോലെ ഇരിക്കുന്ന കാർബൺ ആറ്റങ്ങളുടെ വിന്യാസമാണ് ഗ്രാഫീന്റെ ഘടന. വേണ്ടത്ര അളവിൽ ഉത്പാദനഘട്ടത്തിൽ ഗ്രാഫീൻ കൂട്ടുചേരുന്നതോടെ പ്ലാസ്റ്റിക്, പെയിന്റ്, കോൺക്രീറ്റ്, റോഡുണ്ടാക്കുന്ന അസ്ഫാൾട്ട് തുടങ്ങിയ പലതിന്റെയും ഉറപ്പ് പതിമടങ്ങായി വർധിക്കും. എന്നാൽ, നിലവിലുണ്ടായിരുന്ന കുഴപ്പം ഇന്നുവരെ ലഭ്യമായ നിർമ്മാണ വസ്തുക്കളില്‍ ഏറെ വിലപിടിപ്പുള്ള ഒന്നായിരുന്നു ഗ്രാഫീൻ. നിലവിൽ ഒരു മെട്രിക് ടണ്ണിന് ഒന്നരക്കോടിയോളം വിലയുണ്ട് ഗ്രാഫീനിന് . എന്നാൽ, ഈയടുത്ത് ടെക്‌സസിലെ ഹൂസ്റ്റണിലുള്ള റൈസ് യൂണിവേഴ്സിറ്റിയിലെ ഗവേഷകർ, ഫ്‌ളാഷ് ഗ്രാഫീൻ നിർമാണത്തില്‍ ഏറെ വിപ്ലവാത്മകമായ ഒരു നേട്ടമാണ് കൈവരിച്ചത്. ഏത് കാർബൺ ഉറവിടത്തിൽ നിന്നും ഗ്രാഫീൻ നിർമ്മിക്കാവുന്ന ഒരു വഴിയാണ് അവർ കണ്ടെത്തിയിരിക്കുന്നത്.
കാർബൺ അടങ്ങിയ എന്തും അസംസ്കൃത വസ്തുവാക്കാം റബ്ബർ, പ്ലാസ്റ്റിക് വെയിസ്റ്റ്, മരങ്ങൾ, കൽക്കരി, ടയർ, തുടങ്ങി പഴത്തൊലിയും പച്ചക്കറി വേസ്റ്റും പോലും അസംസ്കൃത വസ്തുവാക്കാം. ഈ പ്രക്രിയയിൽ ഒരു ലായകങ്ങളും രാസവസ്തുക്കളും ഉപയോഗിക്കപ്പെടുന്നില്ല എന്നതും ശ്രദ്ധേയമാണ് .
രണ്ട് ഇലക്ട്രോഡുകൾക്കിടയിൽ ഈ കാർബൺ സോഴ്സ് അസംസ്കൃത വസ്തുവില്‍ ഒരു പൊട്ടൻഷ്യൽ ഡിഫറൻസ് പ്രയോഗിക്കപ്പെടുന്നതോടെ, പത്തു മില്ലി സെക്കൻഡ് നേരം കൊണ്ട് അതിന്റെ ഊഷ്മാവ് 3000 ഡിഗ്രി സെൽഷ്യസിലേക്ക് ഉയർത്തപ്പെടുന്നു. ആ ഉയർന്ന താപനിലയിൽ വളരെ പെട്ടെന്ന് ആ അസംസ്കൃതവസ്തു ഗ്രാഫീൻ ആയി മാറുന്നു. വളരെ ചെലവ് കൂടിയ പ്രക്രിയയായിരുന്ന ഗ്രാഫീൻ നിര്‍മാണത്തിന്‍റെ ചിലവ് കുറയ്കാന്‍ ഈ മാർഗത്തിനാകും .
” കേടാകുന്ന ഭക്ഷണം ടൺ കണക്കിനാണ് നാട്ടിൽ വലിച്ചെറിയപ്പടുന്നത്. പ്ലാസ്റ്റിക് വേസ്റ്റും ഒരു ചിന്താവിഷയമാണ്. ഇതൊക്കെ അസംസ്കൃതവസ്തുക്കളുടെ രൂപത്തിൽ ഗ്രാഫീൻ ഉണ്ടാക്കാൻ പ്രയോജനപ്പെട്ടാൽ, പരിസ്ഥിതി സൗഹൃദമായ ഒരു വ്യവസായിക വിപ്ലവത്തിന് വഴിതെളിക്കും . കാലാവസ്ഥാ വ്യതിയാനത്തെ ചെറുക്കാനും, ആഗോള താപനത്തെ കുറയ്ക്കാനും ഈ സാങ്കേതികവിദ്യ സഹായിക്കും.” റൈസ് യൂണിവേഴ്സിറ്റിയിലെ നാനോ സയൻസ് പ്രൊഫസർ ആയ ജെയിംസ് ടൂർ പറയുന്നു.
You must be logged in to post a comment Login