ഏക മകനെ മരണം കവർന്ന സങ്കടം മറക്കാൻ 54-ാം വയസ്സിൽ ലളിതക്കു കൂട്ടായി ഇരട്ടകണ്മണികൾ !

തൃശൂർ:  ഏക മകനെ മരണം കവർന്ന സങ്കടം മറക്കാൻ 54-ാം വയസ്സിൽ ലളിതക്കു കൂട്ടായി ഇരട്ടകണ്മണികൾ ” ഞങ്ങളുടെ ​ഗോപിക്കുട്ടന് പകരം ദൈവം തന്നതാണ് ഇവരെ. ഒരാളെ ഞങ്ങൾ ​ഗോപിക്കുട്ടൻ എന്നു തന്നെ വിളിക്കും, ഒരാളെ ​ഗോകുൽകുട്ടനെന്നും ”  പറയുന്നത് തൃശൂർ സ്വദേശികളായ മണിയും ഭാര്യ ലളിതയും. മണിക്കും ഭാര്യക്കും അവരുടെ ജീവിതത്തിൽ പ്രതീക്ഷയായി ആകെ ഉണ്ടായിരുന്നത് അവരുടെ ഏക മകൻ ​ഗോപിക്കുട്ടനായിരുന്നു. എന്നാൽ 2017 മെയ് 17 ന് ​ഗോപിക്കുട്ടൻ സഞ്ചരിച്ച ബൈക്കിൽ ലോറിയിടിച്ച് ​ഗോപിക്കുട്ടൻ മരിച്ചു. ഇതോടെ ഇവരുടെ ജീവിതത്തിലെ പ്രകാശം നഷ്ടപ്പെട്ടു. തങ്ങളുടെ ജീവിതം ഇവിടെ തീർന്നു എന്നു തോന്നിതുടങ്ങിയതോടെ ഒരു കുഞ്ഞ് ഉണ്ടായിരുന്നെങ്കിൽ എന്ന ആ​ഗ്രഹം ശക്തമായി. എന്നാൽ 35-ാം വയസ്സിൽ പ്രസവം നിർത്തിയ ലളിതയുടെ മുന്നിലുള്ള ഏക വഴി കൃത്രിമ​ഗർഭധാരണം (IVF) മാത്രമായിരുന്നു. ബീജവും അണ്ഡവും ശരീരത്തിന് പുറത്ത് വെച്ച് സംയോജിപ്പിച്ച് ഭ്രൂണത്തെ പിന്നീട് ​ഗർഭ പാത്രത്തിൽ നിക്ഷേപിക്കുന്ന ചികിത്സാ രീതിയാണ് IVF. 40 ശതമാനം മാത്രം വിജയ സാധ്യതയുള്ള ഈ ചികിത്സ വലിയ ചിലവ് ഉള്ളതാണ്. ഓട്ടോ ഓടിച്ചു കുടുംബം പുലർത്തിയിരുന്ന മണിക്ക് ചികിത്സയ്ക്ക് വേണ്ടിവരുന്ന ചിലവ് താങ്ങാൻ കഴിയുമായിരുന്നില്ല. എങ്കിലും ആ​ഗ്രഹം അത്ര വലുതായതു കൊണ്ട് അവർ പ്രതീക്ഷ കൈവിടാതെ ​ഗൈനക്കോളജിസ്റ്റായ ഡോ.കൃഷ്ണൻ കുട്ടിയെ കാണാൻ പോയി. “ചികിത്സ സൗജന്യമായി ചെയ്തു തരാം മരുന്നിന്റെ പണം മാത്രം നൽകിയാൽ മതി”യെന്നായിരുന്നു ഡോക്ടർ പറഞ്ഞത്. ഇതോടെ ചികിത്സ ആരംഭിച്ചു. ഏഴുമാസം നീണ്ടു നിന്ന ചികിത്സ വിജയം കണ്ടു. കൃത്രിമ ​ഗർഭധാരണത്തിലൂടെ ലളിത മൂന്നു കുഞ്ഞുങ്ങളെ ​ഗർഭം ധരിച്ചു. പക്ഷേ ഒരു കുഞ്ഞിനെ ​ഗർഭ കാലത്തു തന്നെ നഷ്ടപ്പെട്ടു. അതോടെ നവംബർ മാസം രണ്ടാം തീയതി ലളിതയെ തൃശൂർ മെഡിക്കൽ കോളേജിലേയ്ക്ക് മാറ്റി. 34-ാം ആഴ്ചയിൽ ഡോക്ടർ മേഘ ജയപ്രകാശിന്റെ നേതൃത്വത്തിൽ കുഞ്ഞുങ്ങളെ പുറത്തെടുത്തു. ജനിച്ചപ്പോൾ ശരീര ഭാ​രം കുറവായിരുന്നെങ്കിലും ഇപ്പോൾ പൂർണ ആരോ​ഗ്യവന്മാരാണ് കുഞ്ഞുങ്ങൾ. തലോരിയിൽ ഉള്ള വീട് വൃത്തിയാക്കി കുഞ്ഞുങ്ങളുമായി അങ്ങോട്ടു പോകണം എന്ന് മണി പറയുന്നു.  ഇപ്പോള്‍  അവർ ഒളരിയിലുള്ള നേഴ്സിം​ഗ് ഹോമിൽ ആണ് താമസിക്കുന്നത്. ” കുഞ്ഞുങ്ങൾക്ക് ഇവിടുത്തെ നേഴ്സുമാർ പേരിടാം എന്നു പറഞ്ഞിട്ടുണ്ട് ഞങ്ങളിട്ടത് വിളിപ്പേരായി കിടക്കട്ടെ” സന്തോഷത്തോടെ മണി പറയുന്നു.