തിരുവനന്തപുരം: സംസ്ഥാനത്ത് ഡീസൽ വിലയിൽ വര്‍ധനവ്. ഡീസൽ ലിറ്ററിന് 15 പൈസ കൂടി 71.24 രൂപയായി. അതേസമയം പെട്രോൾ വില ലിറ്ററിന് 78.06 രൂപയിൽ തുടരുകയാണ്. ആഗോള വിപണിയിലെ വില വ്യത്യാസമാണ് ആഭ്യന്തര വിപണിയിലും പ്രതിഫലിച്ചത്.
ഡീസൽ വില ഒരാഴ്ചയായി മാറ്റമില്ലാതെ തുടരുകയായിരുന്നു. മുൻപ് കേന്ദ്ര സര്‍ക്കാരിൻ്റെ ആദ്യ ബജറ്റിൽ എക്സൈസ് നികുതിയും സെസും വര്‍ധിപ്പിച്ചതിനെ തുടര്‍ന്നാണ് ഇന്ധനവില കുത്തനെ ഉയര്‍ന്നത്. ഇന്ധന നിരക്കിൽ ഒരു രൂപ വീതം എക്സൈസ് നികുതിയും റോഡ് അടിസ്ഥാന സൗകര്യ സെസുമാണ് കേന്ദ്ര സർക്കാർ ചുമത്തിയിരുന്നത് .
തിരുവനന്തപുരത്ത് ഡീസൽ ലിറ്ററിന് 71.24 രൂപയിലും പെട്രോള്‍ ലിറ്ററിന് 78.06 രൂപയിലുമാണ് ഇന്ന് വ്യാപാരം നടക്കുന്നത്. കൊച്ചിയിൽ പെട്രോള്‍ ലിറ്ററിന് 76.71 രൂപയും ഡീസൽ 69.89 രൂപയുമാണ്. കോഴിക്കോട് പെട്രോൾ ലിറ്ററിന് 77.04 രൂപയും ഡീസൽ ലിറ്ററിന് 69.89 രൂപയുമാണ് ഇന്നത്തെ നിരക്ക്.രാജ്യതലസ്ഥാനമായ ഡൽഹിയിൽ പെട്രോളിന് 74.63 രൂപയും ഡീസലിന് 66.19 രൂപയുമാണ്.
ആഗോള വിപണിയിലെ ക്രൂഡ് ഓയിൽ വിലയും ഡോളര്‍ രൂപ വിനിമയവും കണക്കാക്കിയാണ് രാജ്യത്തെ ഇന്ധനവില നിര്‍ണയിക്കുന്നത്. ഒരു ബാരൽ ക്രൂഡ് ഓയിലിന് 66.16 ഡോളറാണ് ഇന്നത്തെ വില. അതേസമയം ഇന്ന് ഡോളര്‍ 70.99 രൂപയിലാണ് വിനിമയം നടക്കുന്നത്.
You must be logged in to post a comment Login